بو آتش هجرانيوه اودلاندي عالم يا علي(ع)!
آغلار غمينده حضرت زهرا(س) و خاتم (ص) ياعلي(ع)!
بو اود نه اوددور سر به سر داغلوب جهاني يانديرير؟!
شعله ساليب محفللره ، پير و جواني يانديرير!
سرگشته چؤللرده گزن صاحبزماني يانديرير
هئچ مرد دوران گؤرمه ييب بو نحو ماتم يا علي (ع)!
اي آفتاب لم يزل،دنياي عشقين مهتري!
رحمتسراي حقّده عدل و شرافت مظهري!
اي عارف شيرين سخن، اهل حقيقت ياوري!
گردش ائدير شمس و قمر،عشقينله توأم ياعلي(ع)!
سن سيز بو ماتم ،حضرت زينب(س) دن آيريلماز داها
آسايش دورانيده ، مظلوم بالان قالماز داها
حقّي اذيّت ائتمه دن ، شرمه عدو دالماز داها
سنسيز عدالت امن دن دوشدي مسلّم يا علي(ع)!
بير عؤمر اولموش خونجگر ، درد دلين چاهه دئدين!
غيرت سرودين دال با دال زهرا(س) تكي ماهه دئدين!
معناده يعني سؤزلرين هر لحظه آللاهه دئدين!
نامردلردن گلمه دي اسراره محرم ياعلي(ع)!
اولدي قارانليق بير بولوت كوفه،حقيقت ماهينه
بي حرمتي ائتدي ريا قومي خدا درگاهينه
مذهب يوليله ووردولار ضربه عدالت شاهينه
جان يانديران نيسگيلدي بو سوز دمادم ياعلي(ع)!
آيا مگر حق مشعلين دونياده سؤندورمك اولار؟!
بخت اولدوزون هر توزلو بير آيينه ده گؤرمك اولار؟!
ائتدي خيال اهل ستم انواري اؤلدورمك اولار
اؤز بختينه ووردي عدو شمشيري محكم يا علي(ع)!
سن اؤلمه ييبسن! آغلادان خلقي بو غم درياسي دير
هر درددن كسگين اولان ، بير دونيا هيجران ياسي دير
داغلار ووران عاشقلره ، آنجاق زمان سوداسي دير
هاردا وار آخر سن تكي مظلوم اعلم يا علي(ع)؟!
بولبول يئرينده اوتدو چون بايقوش،قانادي باغلادار
شعريله شير عالمي هم اؤلدوره ر هم آغلادار
اول قدر تكرار ائيلييه ر ، صاحب زماني داغلادار
تلقين ائده ر اؤلمك سؤزون شيطانلا باهم يا علي(ع)!
حُرمت بو گون محفوظ دور بيزدن سنين تك سروره
دونيا اولا قوربان گئنه آزدير مقام حيدره
آنجاق خياليمدا گزيز باخ گؤر نه عالي منظره!
خاليقله مئهمانليقلارين اولموش مجسّم يا علي(ع)!
هيجران غمين احساس هئچ نامرد عالم ائيلمز
بو دردي هر عاشق اولان آدم دويوب فهم ائيلمز
باغلار اُميدين يوللارين، آينده يه رحم ائيلمز
تعظيم ائده ر امّا سنه، عيساي مريم(ع) ياعلي(ع)!
مين ابن ملجم بير نفر جيلدينده قالديردي خطر
ائتدين بو فاني دونيادان البتّه نيسگيللي سفر
اودلاندي امّت سر به سر داغلاندي قلب دادگر
چوخ سيررلر قالدي گئنه مجهول و مبهم يا علي(ع)!